Besøk på skulen

Som eit ledd i overgangsprosessen frå barnehage til skule, blir førskulebarna kvar vår invitert på besøk til skulen. Då besøker dei vennene sine, som går i første klasse.

Dei gjekk, hand i hand, ned til skulen, og øvde på å ferdast på skuleveg.

Førsteklassingane venta på oss. Nokre av dei kunne fortelje at dei hadde vakna grytidlig på morgonen fordi dei gledde seg slik til besøk. Gjensynsgleden var stor, og vi let oss imponere litt over kor røynde skuleungar dei allereie hadde blitt.

Førsteklassingane viste oss rundt, og barna leika ute og gjorde seg litt kjende med skulen sitt uteområde.

Då ordenseleven ringde med bjella, gikk vi inn.

Førskulebarna åt medbrakt nistepakke og dei drakk skulemjølk medan læraren las eventyret om storetrollet og lilletrollet. 

I tematimen lærte dei om småkryp, og det var marihøna som sto i fokus.

Som seg hør og bør fekk elevane oppgåver på ark, som vi tok med tilbake til barnehagen og sette i førskulepermane.

Etter skuleslutt tok vi skulebussen tilbake til barnehagen.